TINCHLIK – ENG ULUG‘ NE’MAT

8

          Tinchlik — inson hayotidagi eng buyuk ne’matlardan biri. Inson uning qadrini ko‘pincha yo‘qotish xavfi tug‘ilgandagina chuqurroq anglaydi. Vaholanki, tongni xotirjam qarshi olish, farzandlarning kulgisini eshitish, bemalol mehnat qilish, ilm olish va ertangi kundan umid bilan yashashning o‘zi — ulkan ne’matdir.

Tinchlik hukm surgan yurtda taraqqiyot uchun yo‘l ochiladi. Osoyishtalik bor joyda ilm-fan rivojlanadi, ta’lim maskanlari obod bo‘ladi, mehnat unumdorligi ortadi, insonlar o‘z orzu va maqsadlari sari dadil qadam tashlaydilar. Farzandlar maktab va ta’lim dargohlariga qo‘rquvsiz boradi, yoshlar kelajak rejalarini erkin tuzadi, ota-onalar esa farzandlarining kamolini xotirjam kuzatadi.

Aksincha, urush va nizolar hukmron bo‘lgan joyda inson hayotining odatiy tartibi buziladi. Xonadonidan fayz, qalbidan xotirjamlik, jamiyatdan barqarorlik ketadi. Tarixga nazar tashlasak, urush va nizolar qanchadan-qancha insonlarning hayotiga, oilalar taqdiriga va butun xalqlarning kelajagiga og‘ir ta’sir ko‘rsatganini ko‘ramiz. Shu bois tinchlikni asrash faqat bugunning emas, kelajak avlod oldidagi ham buyuk mas’uliyatdir.

Muqaddas dinimiz ham tinchlik, osoyishtalik, mehr-oqibat va o‘zaro totuvlikni ulug‘laydi. Islom insonlarni yaxshilikka, kechirimlilikka, bir-biriga ozor yetkazmaslikka va jamiyatda ahillikni qaror toptirishga chaqiradi. Insonlar o‘rtasida hurmat, bag‘rikenglik va hamjihatlik qaror topsa, jamiyatning ma’naviy poydevori ham mustahkam bo‘ladi.

Tinchlik faqat qurollar sukut saqlashi emas. Tinchlik — qalbda xotirjamlik, xonadonda fayz, jamiyatda o‘zaro hurmat va insonlar o‘rtasida mehr-oqibat mavjudligidir. Shuning uchun uni asrash har bir insonning kundalik muomalasi va munosabatidan boshlanadi.

Xalqimizda:

“Tinchlik bor joyda baraka bor” degan purma’no hikmat bor. Yana:

“Yurt tinch — el tinch” degan maqol ham xalqimizning asrlar davomida shakllangan hayotiy tajribasini ifoda etadi.

Darhaqiqat, yurt tinch bo‘lsa, inson mehnat qiladi, rizqini topadi, farzand tarbiyalaydi, ilm oladi va kelajakka ishonch bilan qaraydi. Tinchlik bor joyda bolalarning beg‘ubor kulgisi, onalarning duosi, otalarning mehnati va yoshlarning ezgu orzulari uchun keng imkoniyatlar paydo bo‘ladi.

Ayniqsa, yosh avlodga tinchlikning qadrini anglatish muhim. Zero, bugun ular uchun oddiydek tuyulgan osoyishta hayot aslida minglab insonlarning mehnati, sabri, duosi va yurtga bo‘lgan sadoqati bilan asrab kelinayotgan ulug‘ ne’matdir. Tinchlikni qadrlash — uning qimmatini bilish; uni asrash esa o‘zidan keyingi avlodga farovon hayot qoldirish demakdir.

Tinchlikni mustahkamlash faqat bir inson yoki bir tashkilotning vazifasi emas. U oiladagi tarbiyadan, qo‘shnilar o‘rtasidagi hurmatdan, jamiyatdagi o‘zaro bag‘rikenglikdan boshlanadi. Qonunlarga hurmat, Vatanga sadoqat, bir-birining haq-huquqini qadrlash va nizolarni tinch yo‘l bilan hal etish — osoyishtalikning muhim asoslaridir.

Zero, tinchlik bor ekan — insonning orzusi bor, mehnatining samarasi bor, ilmning ziyosi bor, farzandlarning kelajagi bor.

Shunday ekan, tinchlikni oddiy hol deb emas, Alloh taoloning ulug‘ ne’matlaridan biri deb qadrlashimiz, uni asrashga munosib hissa qo‘shishimiz lozim.

Chunki tinchlik — shunchaki osoyishta hayot emas. Tinchlik — onaning xotirjam duosi, bolaning beg‘ubor kulgisi, otaning halol mehnati va insonning ertangi kunga bo‘lgan ishonchidir.

Alloh taolo yurtimiz tinchligini, xalqimiz osoyishtaligini, xonadonlarimiz fayzu barakasini bardavom qilsin. Yurtimizning osmoni doimo musaffo, qalblarimiz xotirjam, kelajagimiz obod bo‘lishini nasib etsin. Omin.

 

Maxtumquli TOSHQULOV

Xoja Buxoriy islom ta’lim muassasasi o‘qituvchisi