Maqolalar
569

Alloh taolo o‘zi suygan bandalariga o‘zgalarga yaxshilik qilish, odamlarga mehr ulashib, har doim elu yurtga foydasi tegayotganidan zavq olib yashash xislatini berdi.
Jamiyat saodati, qonuniy tartiblar va oilalar mustahkamligida qarindoshlik aloqalarining ahamiyati muhimdir. Zero, Alloh taolo aytadi:
إِنَّ اللّهَ يَأْمُرُ بِالْعَدْلِ وَالإِحْسَانِ وَإِيتَاء ذِي الْقُرْبَى وَيَنْهَى عَنِ الْفَحْشَاء
وَالْمُنكَرِ وَالْبَغْيِ يَعِظُكُمْ لَعَلَّكُمْ تَذَكَّرُونَ
"Albatta, Alloh adolatli, ezgu ishlarga va qarindoshlarga yaxshilik qilishga buyuradi hamda buzuqchilik, yovuz ishlar va zulmdan qaytaradi. Eslatma olursiz, deb (U) sizlarga (doimo) nasihat qilur". (Nahl surasi 90-oyat)
Haq taolo qarindoshlik rishtalariga, haq-huquqiga rioya qilishlikni kishilarning ulug‘ sifatlaridan deb baholadi:
الَّذِينَ يُوفُونَ بِعَهْدِ اللّهِ وَلاَ يِنقُضُونَ الْمِيثَاقَ {20} وَالَّذِينَ يَصِلُونَ مَا أَمَرَ اللّهُ بِهِ أَن يُوصَلَ وَيَخْشَوْنَ رَبَّهُمْ
وَيَخَافُونَ سُوءَ الحِسَابِ {21}
“Ular Allohga bergan ahdlariga vafo qiladigan va "al-Miysoq"ni (va’dani) buzmaydiganlardir. Ular Alloh bog‘lanishga buyurgan narsalarni (ya’ni qarindoshlar bilan aloqani) bog‘laydilar, Parvardigorlaridan qo‘rqadilar va (oxiratda) hisob-kitobning noxush kechishidan cho‘chiydilar”. (Ra’d surasi 20-21 oyatlar)
Abu Hurayra roziyallohu anhudan rivoyat qilinadi:
Nabiy sollallohu alayhi vasallam: “Kimni rizqini kengaytirilishi va ajalini ortga surilishi masrur qilsa, qarindoshlariga silai raqm qilsin”, dedilar. Uchovlari rivoyat qilishgan.
Silai rahm qanchalik ahamiyatga ega amal ekanini ushbu hadisi sharifdan bilib olsak bo‘ladi.
Buxoriy, Abu Dovud va Termiziylarning rivoyatida:
“Silai rahm qiluvchi berganga yarasha qaytargan emas. Lekin silai rahm qiluvchi o‘zining silai rahmi kesilganda uni bog‘lovchidir”, dedilar.
Payg‘ambar sollallohu alayhi vasallam bu hakda o‘zlarining boshqa bir hadisi shariflarida:
“Uch narsa Allohning nazdida karamli axloqdandir; senga zulm qilganni avf qilmog‘ing, seni mahrum qilganga ato bermog‘ing va sen bilan aloqani uzgan bilan aloqa bog‘lamog‘ing”, deganlar.
Abu Hurayra (r.a.)dan rivoyat qilinadi:
“Nabiy sollallohu alayhi vasallam: “Nasablaringizdan silai rahm qiladigan narsangizni ta’lim oling. Chunki silai rahm ahlning muhabbatidir, molu mulkning ko‘pligidir va umrning ziyodaligidir”, dedilar.
Mehr-oqibat va odamiylik yo‘q joyda ahillik, totuvlik, og‘izbirlik bo‘lmaydi. Bu qadriyat nafaqat jamoa yoki jamiyat uchun, balki har bir oila uchun ham ahamiyatlidir. Aka-ukalar yoki opa-singillar o‘rtasida mehr-oqibat bo‘lmasa, jabrini ota-ona tortadi. Shuning uchun bolalarni yoshligidan, avvalo, bir-biriga nisbatan, qolaversa, boshqalarga nisbatan ham mehr-oqibatli qilib o‘stirish kerak. Shuningdek, qarindosh-urug‘lar, tanish-bilishlar, hamkasblar, qo‘ni-qo‘shnilar, hatto begonalar o‘rtasida ham mehr-oqibat zarur.


Azamat USMONOV

Muallif: Админ
Sana: 02.09.2020
124
568

O‘zbekiston tarixan juda qisqa davrda ulkan yutuqlarga erishdi va erishmoqda. Milliy ma’naviyatimiz va qadriyatlarimiz tiklandi, milliy o‘zligimizga qaytdik. Tinchlik va barqarorlik kundalik xayotimizning uzviy qismiga aylandi.

Ayni paytda, osuda hayotimizni izdan chiqarishga urinayotgan yovuz kuchlarning mavjudligini ham kayd etish lozim. Shu nuqtai nazardan qaraganda, tinchlikni asrash, uni asrab-avaylash bugungi kunda ham dolzarb ahamiyat kasb etadi.
Ekstremizm qanday nomlanmasin yoki qanday ko‘rinishga ega bo‘lmasin, uning asosiy maqsadi jangari guruhlarni shakllantirish orqali hokimiyatni qo‘lga kiritishdir.
O‘z maqsadlariga erishish uchun barcha ekstremistlar zo‘ravonlik, ya’ni terrorchilik harakatlarni amalga oshirish yo‘li bilan omma ichida qo‘rquv paydo qilish va o‘zlarining kuchlarini ko‘rsatish orqali hukumatga bosim va tazyiq o‘tkazishga intiladilar.
O‘n to‘rt asrdan buyon e’tiqodida mustahkam bo‘lgan xalqni noto‘g‘ri yo‘lga boshlash samarasiz kechishi turgan gap. Davlatmiz tomonidan dinimizga shunchalar imkoniyatlar berilib turgan bir paytda mazkur toifalar dinga faqat zarar keltirmoqda.
Shunday ekan, Payg‘ambarimizning: «Mo‘min odam o‘zini bir kavakdan ikki marta ilon chaqib olmog‘iga yo‘l qo‘ymas!» – degan hadislarini yoki xalqimizning: «Ko‘r hassasini bir marta yo‘qotadi», – degan dono gapini doimo yodda tutish lozim.
Har bir insonning o‘z ishini sidqidildan amalga oshirishi, loqaydlik, beparvolikning oldini olishi, o‘z atrofida bo‘layotgan voqealarga teran nigoh bilan qarab, Vatan tinchligi yo‘lida hushyor va ogoh bo‘lib yashashi, ajdodlarimizga armon bo‘lib qolgan, biz erishgan mustaqillik va tinchlik-osoyishtalikni ta’minlashning muhim omili hisoblanadi.
Payg‘ambarimiz (s.a.v.)ning "Sizlardan birortangiz to, o‘zi uchun yaxshi ko‘rgan narsani, birodari uchun ham ravo ko‘rmaguncha mo‘min bo‘la olmaydi", degan hadislarida har bir muminning o‘zidan boshqa kishilarga ham yaxshilikni ravo ko‘rishi zarurligi qayd qilingan. Boshqacha kilib aytganda, inson o‘zi uchun yaxshi ko‘rgan narsalarni o‘zgalarga ham ravo ko‘rmagunicha komil mo‘min bo‘la olmaydi. Har kim ham eng avvalo o‘zi, oilasi va yaqinlari uchun sog‘lik-salomatlik baxt-saodat, tinchlik va farovonlikni istashini inobatga oladigan bo‘lsak Payg‘ambarimiz hadislarining asl ma’nosi oydinlashadi.
Muqaddas dinimiz ham kishilarni tinchlikni asrash va barqarorlikni ta’minlash yo‘lida imon, insof, adolat, hamjihatlik va birdamlik bilan harakat qilishga, fitna va o‘zaro adovatga barham berishga chaqiradi. Bu bejiz emas, albatta. Zero, tinchlikparvarlik islom dinining mohiyatini tashkil etadi.

Sirjiddin Jahonov,
“Xoja Buxoriy” islom bilim yurti o‘qituvchisi

Muallif: Админ
Sana: 02.09.2020
109
567

Insonni go‘zal suratda, tana a’zolarini mutanosib va ko‘rkam holda yaratgan, Yer yuzida tinch-osoyishta va qiyinchiliksiz umr kechirishi uchun juda ko‘p ne’mat va qulayliklarni ato etgan Alloh bandalarni yaxshilikka chorlab, yomonliklardan qaytaradi.
Payg‘ambarimiz (sollallohu alayhi va sallam): “Kimga yaxshilik qilish eshigi ochilsa, foydalanib qolsin, zero, uning qachon yopilishini bilmaydi” deganlar. Yaxshi xulq-atvor kishilarga yaxshilik qilish ezgu xislat va olijanob fazilatdir. Buyuk mutafakkirlarimiz ham odamlarni yaxshilikka, yaxshi xulq-atvorli, namunali va ibratli bo‘lishga undaydi, to‘g‘rilik, mehribonlik, halollik kabi ezgu insoniy xislatlarni targ‘ib qiladi.
Shunday ekan, qilayotgan amallarimizga bir nazar solaylikchi, bu o‘tkinchi dunyoda qanday yaxshi amallarni bajarayapmiz. Ota-ona, aka-uka, qarindosh va qo‘shnilarni haqqini beminnat ado etayapmizmi? Yana ham chuqurroq o‘ylab ko‘raylikchi, o‘zimiz qolib birovlarning aybu nuqsonini izlash bilan ovora emasmikinmiz? Ko‘nglimizni, xulqimizni, ikki dunyomizni bezash qolib, boshqalarga loy chaplash bilan mashg‘ul emasmikinmiz? Hayotimizda mol-dunyodan ham qimmatliroq ezgu amallar, insoniy fazilatlar-insof, diyonat, uyat, or-nomus, iffat, burch, savob, sadoqat, vafo, hayo kabi yuksak axloqiy tuyg‘u va qadriyatlar qolib, g‘iybat, tuhmat, riyo, hasad kabi illatlar bilan ovora emasmikiniz? Silai rahm qilish qolib, aka-uka, opa-singil, hattoki ota va bolalar uy-joy talashib, meros bo‘lisholmay o‘rtalarini g‘ishtin devoru-to‘siqlar bo‘lmasa-da, “ko‘rinmas devor” to‘sib qolmayaptimikin? Er-xotin yoki qaynona-kelin janjallari tufayli bolalar yetim qolmayaptimikin? Eng achinarlisi, ba’zi noqobil o‘g‘il-qizlar boylik va imkoniyatlari bo‘laturib, ota-onalari keksaygach, ojiz va notavon bo‘lishganida ularni e’zozlab, parvarishlash o‘rniga qarovsiz tashlab, yoki qariyalar uyiga jo‘natayotganlarida e’tiborsiz loqaydlarcha qarab turmayapmizmikin? Kitob o‘qish, ilmu hunar o‘rganish va o‘rgatish o‘rniga, umuman uchrashmagan, ismlarini ham bilmaydigan insonlar bilan vaqti kelsa, ijtimoiy tarmoqlarda soatlab behuda "gap sotamayapmizmikin"? Yoru do‘stlarimiz kimlarningdir aldoviga uchib, o‘zga yurtlarda xoru zor bo‘lguniga qadar g‘aflatda qolmayapmizmikin? To‘y, marosim va ma’rakalarni me’yorida o‘tkazishga harakat qilinayotganligini bila turib, savob qilayapman, yaxshilik qilayapman deb isrofga yo‘l qo‘ymayapmizmikin? Internet tarmoqlari, chet el teleradiokanallari orqali borgan sari keng targ‘ib etilayotgan umuminsoniy qadriyatlarga zid illatlar va axloq me’yorlariga butunlay qarshi bo‘lgan film, klip va fotosuratlar yoshlarimiz onggiga salbiy ta’sir ko‘rsatib, ulardagi insoniy fazilatlarning yemirilishiga olib kelayotganiga beparvo emasmikinmiz? Shular haqida bir o‘ylab ko‘raylik. Beparvo, loqayd qarab turmaylik.
O‘tkinchi mol-dunyoga hirs qo‘ymasdan, Berilgan ne’matlarning shukrini ado qilib, farzandlarimizga odob-axloq, ilmu hunar o‘rgataylik. Mustaqil Vatanimizni yanada gullab yashnashi uchun odilona mehnat qilib, bir-birimizga mehr muhabbatli, g‘amxo‘r, suyanchiq bo‘laylik.
Azamat Usmonov

Muallif: Админ
Sana: 02.09.2020
94
566

Mustaqil diyorda yashash har bir inson uchun o‘zgacha shodlik va baxt, shukh hadiya etadi. Yurtimizning mustaqil yurt bo‘lib gullab yashnab kelayotganligiga yaqin kunlarda 29 yil to‘ladi. Bu esa xalqimiz uchun iftixor va faxr tuyg‘usi bilan yashashlikka, yurtimizning gullab yashnayotganligi uchun kerak bo‘lsa jon fido qilib, mustaqil diyorimizni asrab avaylashga bo‘lgan muhabbatini yanada jo‘sh urishiga sabab bo‘ladi desak mubolag‘a bo‘lmaydi. Shu bilan birga hurmatli yurtboshimiz Shavkat Mirziyoyev yaratib berayotgan shart-sharoitlar esa beqiyosdir. Bunga misol qilib, diniy-ma’rifiy soha faoliyatinitakomillashtrish bo‘yicha qo‘shimcha chora-tadbirlar to‘g‘risida diniy-ma’rifiy soha faoliyatini takomillashtirish bo‘yicha qo‘shimcha chora-tadbirlar to‘g‘risida Prezident qarorlari hech bir insonni befarq qoldirmaydi.
“Ilm, ma’rifat va raqamli iqtisodiyotni rivojlantirish yili”da amalga oshirishga oid Davlat dasturi to‘g‘risida”gi O‘zbekiston Prezidenti Farmoni imzolandi. Bu yilgi davlat dasturi 299ta banddan iborat bo‘lib, unda umumiy qiymati 18,2 trln. so‘m va 10,3 mlrd. AQSh dollariga teng loyihalar tasdiqlangan edi.
Aynan xavfsizlik, millatlararo totuvlik va diniy bag‘rikenglikni ta’minlash hamda tashqi siyosat sohasida ko‘plab ishlar amalga oshirildi. Jumladan: Inson huquqlari bo‘yicha O‘zbekistan Respublikasining milliy strategiyasi tayyorlandi; Inson huquqlari bo‘yicha Osiyo forumi tashkillashtirildi; O‘zbekistan Respublikasi yagona axborot siyosati konsepsiyasi ishlab chiqildi; “Xalqaro do‘stlik kuni” munosabati bilan birinchi marta “Do‘stlik haftaligi” va “Do‘stlik” xalqaro forum-festivali o‘tkazildi; Xalqaro standartlarni inobatga olgan holda davlat siri deb hisoblangan ma’lumotlar ro‘yxatini qayta ko‘rib chiqish hamda uni maxfiylikdan chiqarish bo‘yicha choralar ko‘rildi; Kiberxavfsizlikka doir milliy strategiya va qonun loyihasi ishlab chiqildi;
Bundan tashqari, Surxondaryo viloyati Termiz shahrida «Imom Termiziy» o‘rta maxsus islom ta’lim muassasasi ochildi. Yangi diniy ilm dargohi davlatimiz rahbarining 2019 yil 17-18 oktyabr kunlari Surxondaryo viloyatiga tashriflari davomida bergan topshiriqlari ijrosi yuzasi o‘laroq tashkil etilgan. Ushbu ta’lim muassasasi O‘zbekiston musulmonlari idorasi tasarrufidagi diniy ta’lim maskani bo‘lib, o‘rta maxsus diniy ma’lumotli islom shariati va hadis ilmlari mutaxassisi, imom-xatiblar tayyorlanadi. Mazkur ta’lim muassasasiga 2020-2021 o‘quv yili uchun abituriyentlar qabul imtihonlari asosida o‘qishga qabul qilinadi. Ta’lim muassasasiga umumiy o‘rta ta’lim (11-sinf negizida) yoki o‘rta maxsus, kasb-hunar ta’lim muassasasini tugatganligi haqida hujjat (diplom)ga ega bo‘lgan fuqarolar qabul qilinadi.
Pandemiya sharoitida “Saxovat va ko‘mak” umumxalq harakati o‘tkazildi. Bunda avval ajratilgan 10 trillion so‘m mablag‘ga qo‘shimcha ravishda yurtboshimiz imzolagan Farmonga muvofiq, respublika byudjetidan yana qariyb 2,5 trillion so‘m mablag‘ yo‘naltirish belgilandi.
Shu bilan birga, jamiyatimizda tinchlik, do‘stlik, mehr-oqibat va hamjihatlik g‘oyalarini keng targ‘ib etib kelayotgan diniy sohada xizmat qilayotgan vakillarni moddiy rag‘batlantirish hamda joylarda xayru saxovat, muruvvat borasida amalga oshirilayotgan ishlarni, jaholatga qarshi – ma’rifat ruhidagi keng qamrovli tadbirlarni yangi bosqichga ko‘tarish uchun O‘zbekiston musulmonlari idorasi huzuridagi “Vaqf” xayriya jamoat fondiga 150 milliard so‘m mablag‘ ajratildi.
Hozirda yangi tahrirdagi O‘zbekiston Respublikasining “Vijdon erkinligi va diniy tashkilotlar to‘g‘risida”gi Qonun loyihasi e’lon qilindi. Ushbu qonun loyihasi inson huquqlari bo‘yicha xalqaro standartlar bilan kafolatlangan diniy sohada umume’tirof etilgan huquq va erkinliklar, yurtimizdagi hozirgi diniy vaziyatning o‘ziga xos xususiyatlari va bevosita O‘zbekiston sharoitida dinlararo munosabatlarni shakllanishining tarixiy sharoitlarini o‘z ichiga olgani bilan ahamiyatlidir.
Inshaalloh mamlakatimizda bundan keyin ham islohotlar davom etib, dinimiz rivoj topadi. Yurtimiz tinch, xalqimiz farovon bo‘ladi. Bizning burchimiz esa Yaratgannning ne’matlarini katta-kichik demay, ularni shukrini bajo keltirishdir. Albatta Alloh taolo ham ana shunda bizlardan rozi bo‘ladi. Bu haqda Qur’oni karimda marhamat qilinib: “...Agar shukr qilsangiz (va imon keltirsangiz) U sizlar uchun rozi bo‘lur...”, - deyilgan. Oyatdan ma’lum bo‘ladiki, Allohning roziligini topishni istagan har bir kishi doimo Unga hamd aytib, ne’matlariga shukrona keltirishi, har qanday musulmon ham ana shu ikki kalimani takrorlab yurishga odatlanishi zarurdir. Alloh taolo yurtimizni tinch-osuda qilib yanada gullab yashnashiga o‘zi madadkor bo‘lsin.
O‘. G‘uzarov
“Xoja Buxoriy” o‘rta maxsus
islom bilim yurti mudiri

Muallif: Админ
Sana: 28.08.2020
125
565

“Takfir” Islom olamida ayanchli oqibatlarga sabab bo‘layotgan, jaholat tufayli fitnalarga zamin yaratayotgan tushunchadir.
“Takfir” degani kofirga chiqarish degani. Ya’ni, bir odam boshqa bir kishini iymondan chiqib kofir bo‘ldi degan gapni aytishidir. Dinda g‘uluvga ketish – haddan oshish oqibatida asrimizning dolzarb masalasiga aylangan muammolardan biri musulmonlarni «kofir» deb fatvo chiqarishning ko‘payganidir. Bu masala keyin chiqqan masalalardandir. Rasululloh sollallohu alayhi vasallamning vaqtlarida biror kishini kofir deb hukm chiqarilganini hech kim bilmaydi. Chunki, Payg‘ambarimiz sollallohu alayhi vasallamning o‘zlari musulmonlarni bu ishdan qattiq qaytarar edilar. Anas roziyallohu anhudan rivoyat qilinadi: «Payg‘ambar sollallohu alayhi vasallam: «Uch narsa iymonning aslidir: «Laa ilaha Illallohu» degan kimsaga tegmaslik; gunohi tufayli uni kofirga chiqarmaymiz; amali tufayli uni Islomdan chiqarmaymiz», dedilar». Abu Dovud rivoyat qilgan.
Shariatimizda musulmon kishini aniq hujjat bo‘lmasdan turib, “kofir” deb hukm qilish o‘ta xatarli bo‘lib, aslo mumkin emas! Bu haqda Alloh taolo Qur’oni karimda shunday degan: “Sizga salom bergan kimsaga, mo‘min emassan, demanglar” (Niso surasi 94-oyat).
Demak, Alloh taolo bu oyati karimada shoshma-shosharlik bilan birovning mo‘min emasligi haqida hukm chiqarib, ish ko‘rishdan qaytarmoqda.
Payg‘ambarimiz sallallohu alayhi vasallam “La ilaha illalloh, Muhammadur rasululloh” deb turgan shaxsni kofirga chiqarish xatarini bir qancha hadislarida bayon qilganlar. Jumladan: Rasululloh sallallohu alayhi vasallam bunday dedilar: “Uch narsa imonning aslidandir. “La ilaha illalloh” degan kimsaga tegmaslik, uni gunohi tufayli “kofir” demaymiz, amali tufayli Islomdan chiqarmaymiz” (Imom Abu Dovud rivoyatlari).
Ushbu hadisi sharifda musulmon kishi boshqa dindoshiga nisbatan qanday munosabatda bo‘lishi borasida aniq hukm berilmoqda. Ya’ni, haqiqiy mo‘min boshqa birodarini gunohi tufayli kofirga chiqarmasligi, uni qilgan amali sababli unga “mo‘min emas” degan so‘zni aytmaslik lozimligi uqtirilmoqda.
Yana bir hadisi sharifda Rasululloh sallallohu alayhi vasallam bunday deganlar: “Kim mo‘min kishini kofirga chiqarsa, uni o‘ldirgandek (gunohkor) bo‘ladi” (Imom Buxoriy rivoyatlari).
Ushbu hadisga sharh yozgan ulamolarimiz: “Musulmonni o‘ldirgan qotil qancha gunoh olsa, musulmonni “kofir” deb hukm qilgan kimsa ham xuddi shunday gunohkor bo‘ladi”, – deganlar. Vaholanki, musulmonni o‘ldirish qanday gunoh ekanligi haqida Alloh taolo shunday degan: “Kimda-kim qasddan bir mo‘minni o‘ldirsa, uning jazosi jahannamda abadiy qolishdir. Yana unga Allohning g‘azabi va la’nati yog‘ilur va Alloh unga ulkan azobni tayyorlab qo‘ygandir (Niso surasi 93-oyat).
Kofirga chiqarishning xatari haqidagi mushhur hadisda Payg‘ambarimiz sallallohu alayhi vasallam bunday deganlar: “Agar kishi o‘z birodariga: “Ey kofir” desa, ikkisidan biri kofir bo‘ladi. Agar birodari haqiqatan ham kofir bo‘lsa, to‘g‘ri aytgan bo‘ladi, aks holda bu gapi kofir deguvchini o‘ziga qaytadi” (Imom Muslim rivoyatlari).
Bu ma’nodagi hadislarni yana ko‘plab keltirish mumkin. Ularning barchasida inson boshqa musulmonlarni kofirga chiqarishga shoshmasligi, ayblangan shaxs u aytganidek bo‘lmasa, o‘zi o‘sha sifatga doxil bo‘lib qolishi ta’kidlangan.
Aqida kitoblari, jumladan, “Tahoviy aqidasi”da: “Qibla ahlidan bo‘lgan biror bir musulmonni gunohi tufayli kofir sanamaymiz”, – deyiladi. Shuningdek, boshqa aqida va ularga yozilgan sharhlarda katta gunoh qilgan kishilar garchi uni sodir etish paytida vafot etsa ham, qilgan ishini halol sanamasa, kofir bo‘lmasligi, agar o‘z uqubatlarini dunyoda olsa katta gunohi uchun kafforat bo‘lishi, mobodo vafot etsa, bu – Allohning hohishi: xohlasa azoblashi, xohlasa kechishi bayon qilingan.
Aqida ilmining yetuk bilimdoni Abul Hasan Asha’riy aytadi: “men ahli qibladan birortasini kofirga chiqarmayman. Chunki ularning barchalari yolg‘iz ma’budga ibodat qiladilar”.
Bir musulmonning boshqa bir musulmonga qoni, obro‘si va moli hurmatli bo‘lishi lozim. Rasululloh sallallohu alayhi vasallamning vido hajlarida aytgan quyidagi gaplari buni tasdiqlaydi: “Albatta, sizlarning qonlaringiz, mollaringiz va obro‘laringiz o‘zlaringiz uchun xuddi shu kuningiz, shu oyingiz va shu shaharinigiz kabi hurmatlidir. Shu yerda hozir bo‘lgan kishi hozir bo‘lmaganlarga yetkazsin”.
Yuqoridagi iboralardan biz “takfir” – mo‘’min-musulmonni kofirga chiqarish naqadar xatarli ish ekanini bilib olamiz. Shuning uchun ham ogoh bo‘lishimiz kerak, ehtiyot bo‘lishimiz zarur!


Manbalar asosida A. Asqarov,tayyorladi.
“Xoja Buxoriy” o‘rta maxsus
islom bilim yurti o‘qituvchisi

Muallif: Админ
Sana: 28.08.2020
120