Yangiliklar
424

Shu kunlarda internet saytlari va ijtimoiy tarmoqlarda ayrim manbalar butun dunyoga jiddiy tashvish olib kelayotgan koronavirus xavfli xastaligi sababli jamoaviy ibodatlar vaqtincha to‘xtatilgan va to‘la karantinga olingan masjidlar tahoratxonalarini ochish masalasi muhokama qilinmoqda.
Bugungi kunga kelib ushbu xavfli infeksiya 160 dan ortiq mamlakatda tarqaldi. Dunyo miqyosida kasallanganlar soni 200 ming nafardan oshdi, 8 mingdan ortiq o‘lim holati qayd etildi, 90 mingga yaqin bemor tuzaldi. Epidemiya keng yoyilib ketgani sababli Jahon sog‘liqni saqlash tashkiloti uni pandemiya deb e’lon qildi.

Ming afsuski, bu yuqumli xastalik mamlakatimizni ham chetlab o‘tmadi. Bugungi kunda yurtmizda unga chalingan bemorlar soni 33 nafarga yetdi.

Bu vaziyat oldindan to‘g‘ri baholanib, Respublika maxsus komissiyasi tuzildi va O‘zbekistonga kasallikning ommaviy kirib kelishi hamda keng tarqalishining oldini olish bo‘yicha qat’iy choralar ko‘rildi. Jumladan, odamlar gavjum joylarda ommaviy tadbirlar cheklangan.

Ta’kidlash joizki, masjid va tahoratxona mehnat jamoalari, ta’lim muassasalaridan farqli o‘laroq shunday jamoat joyi hisoblanadiki, u yerda mutlaqo bir-birini tanimagan fuqarolar virus yuqishi mumkin bo‘lgan masofada aloqada bo‘ladi. Ayniqsa, ibodatni bajarish davomida polga to‘shalgan gilamda o‘tirish, sajdaga peshonani tegizish, poklanish o‘rindiqlari yoki buyumlari orqali virus qoldirish, ushbu joyda ibodat qilgan boshqa namozxonning kasallanishi mumkinligi o‘ziga xos holat sanaladi.

Ayni vaqtda, tahoratxonada ko‘rilayotgan dezinfeksiya choralari virusning tahoratxonaga kirgan odamlarga bir-biridan yuqishi ehtimolini oldini olmasligi barchaga ayon. Buning ustiga, tahoratxonaga kirgan har bir fuqaro ketidan qayta dezinfeksiya o‘tkazishning jismonan imkoniyati yo‘q.

Buning ustiga voqelik shuni ko‘rsatmoqdaki, tahoratxonaga kirgan shaxslar birgalikda ushbu masjidda yoki uning yon atrofida, ya’ni ko‘chada namoz o‘qishga harakat qilmoqda. Bu esa barchamiz bugungi kunda xalqimiz, kelajagimiz uchun qat’iy rioya qilishimiz lozim bo‘lgan karantin talablariga mutlaqo zid keladi.

Karantin tadbirlarining ushbu kasallik tarqalgan paytda qanchalik muhim ahamiyatga ega ekanini biz o‘z boshimizdan o‘tkazdik. O‘zbekistonga kasallik tarqalgan hududlardan kelgan 4 nafar odam bilan muloqotda bo‘lgan 19 kishida ushbu kasallik aniqlandi. Bundan ko‘rinib turibdiki, biz dastlabki kunlardan karantin tadbirlarini o‘tkazganimiz o‘z samarasini berdi. Agar 19 bemorni vaqtida karantinga olmaganimizda yoki ehtiyotsizlikka yo‘l qo‘yilganida bu kasallikni yanada ko‘proq odamga yuqtirgan bo‘lar edilar.

Masjidlarda karantin joriy etilishining mazmun-mohiyati shundan iboratki, namozxonlar uydan zarur sababsiz chiqmasdan, ibodatni uyda bajarish orqali o‘zi bilmagan holda notanish shaxslardan virus yuqtirib olishining oldini olish hamda shu orqali bemorlar ko‘payishini to‘xtatishdir.

Qachonki har bir virus aniqlangan shaxslar kam va kimligi aniq bo‘lsa, vaziyatni nazorat qilish va kasallarni kamaytirish oson bo‘ladi.

Ishonchimiz komilki, yuqorida qayd etilganlarni barcha namozxonlarimiz xolis va to‘g‘ri tushunmoqdalar.

Xalqimiz boshqa mamlakatlarda minglab odamlarning halok bo‘lishiga olib kelgan koronavirus tarqalishining oldini olish kabi og‘ir sinovni boshidan kechirayotgan bugungi kunda barchamiz jipslashib, xorijiy davlatlar tajribasida o‘z tasdig‘ini topgan Sog‘liqni saqlash vazirligining tavsiyalariga rioya etishimiz hayotiy muhim masala hisoblanadi.

O‘zbekiston musulmonlari idorasi yana bir karra fuqarolarimizni joriy etilgan karantinga to‘laqonli amal qilishga, alohida zarurat bo‘lmagan taqdirda uyda bo‘lishga, o‘zimiz va oila a’zolarimizni sog‘lig‘ini asrashga chaqiramiz.

Ilohim, yurtimiz tinch, xalqimiz farovon bo‘lsin. Koronavirus atalmish tezda daf bo‘lib, bu balo-ofatdan hech bir yurtdoshimiz zarar ko‘rmasin. Alloh taolo bemorlarga, dardmanlarga shifo bersin. Ofat tez va qisqa fursatda ko‘tarilsin. Qisqa fursatlarda yurtimiz masjidlari jamoatlar bilan yana qoim bo‘lsin!



O‘zbekiston musulmonlari idorasi Matbuot xizmati

Muallif: Админ
Sana: 21.03.2020
334
423

Аввал хабар берганимиздек, Ўзбекистон мусулмонлари идораси ташаббуси билан каронавирус юқумли хасталигини тез орада инсоният бошидан аритиш мақсадида динимиз кўрсатмаларига мувофиқ, бир қатор хайрли ишлар амалга оширилди.
Бугунги фазилатли жума айёмида Ўзбекистон мусулмонлари идорасининг Қорақалпоғистон Республикаси, вилоятлар ва Тошкент шаҳридаги вакилликлари жами 21 бош қора мол, туман-шаҳарлар марказий масжид имом-хатиблари ташаббуси билан ҳомийлар жалб қилинган ҳолда, 386 бош қўй сўйилиб, гўштлари кам таъминланган оилалар, ёрдамга муҳтож кишилар, дуоси мустажоб инсонлар ва меҳрибонлик уйларига хайрия қилинди.
Диний соҳа ходимлари 6 543 та нажот сўраш намозини адо этдилар. 1 466 301 та “Солатун ножия”, 1 277 537 та “Солатун нория”, 234 055 та “Ҳасбуналлоҳу ва ниъмал вакил” каби улуғ саловоти шариф ва дуо, 207 390 марта “Фотиҳа” ва “Ихлос” суралари ўқилди.
Ушбу хатми Қуръонлар, салавотлар ва хайрия ишларининг якуний дуолари Ўзбекистон мусулмонлари идораси раиси, муфтий Усмонхон Алимов ҳазратлари бошчиликларида Тошкент шаҳридаги "Сузук ота" мажмуасида юртимиздаги энг табаррук уламолар томонидан амалга оширилди.
Шу ўринда алоҳида таъкидлаш лозимки, ушбу хайрли ишларга ҳисса қўшиш мақсадида халқимиз томонидан катта ташаббус кўрсатилди. Жумладан, ижтимоий тармоқлар орқали хабар топган юртдошларимиз ўз уйларида, оила аъзолари билан хатми Қуръон ва “Солатун ножия”, “Солатун нория” каби улуғ дуоларни ўқишга киришдилар.
Қийинчилик, мусибат даврида жипслашолишимиз, бир тану бир жонга айлана олишимизни кўрсатди. Бугун эрта тонгдан бошлаб Диний идорага аҳолимиздан қўнғироқлар тинмади. Уларда ихлоси баланд азизларимиз: “Биз шунча хатмона қилдик, бунча саловоти шарифлар ўқидик, бизни ҳам ёзиб қўйинг”, дея хабар бердилар.
Бугун соат 12-00 гадар Диний идорага келиб тушган маълумотларга кўра, юртдошларимиз томонидан 17 та қўй сўйилиб, ҳақдорларга эҳсон қилишган. 213 маротаба хатми Қуръон қилишган, 271 690 киши нажот сўраш намозини адо этишган. 656 864 та “Солатун ножия”, 612 053 та “Солатун нория”, 199 343 та “Ҳасбуналлоҳу ва ниъмал вакил” каби улуғ саловоти шариф ва дуоларни, 350 466 марта “Фотиҳа” ва “Ихлос” сураларини ўқишган. Бундан ташқари, қанчадан-қанча юртдошларимиз айтишга ботинмаган ёки хуфёна тарзда ибодат ва тасбеҳу дуоларда бўлишган.
Халқимиз орасида Аллоҳ таолонинг валий бандалари, дуолари мустажоб чин дўстлари бор. Уларнинг биргина дуолари балоларни аритиши, енгиллик ва кушойишлар келтириши мумкин. Ана шундай азизларимиз ҳам дуоларда бўлдилар, иншоаллоҳ.
Синовли дамларда бутун халқимиз чин ният ва ихлос билан қилган хайрия, эҳсон ва қурбонликлар, кўплаб хатми Қуръон, дуои саловотлар шарофатидан юртимиз, қолаверса, бутун дунёда каронавирус юқумли касаллиги тез орада чекинсин, берморларга комил шифо берсин, масжидларимиз ҳам яқин вақтлар ичида очилиб, мўмин-мусулмон халқимиз билан обод бўлсин!

Ўзбекистон мусулмонлари идораси Масжидлар бўлими

Muallif: Админ
Sana: 21.03.2020
261
422

Мухлисларнинг талаб ва истакларини инобатга олган ҳолда мўмин-мусулмонларимиз томонидан коронавирус инфексиясини тезроқ аритиш мақсадида хонадонларда ўқилган хатми Қуръонлар, саловотлар, дуолар ва хайриялар ҳисобини жамлаш ва умумий дуолар қилиш режалаштирилди.

Шу мақсадда ушбуларнинг ҳисобини юритиш учун иш кунлари соат 09:00 дан 17:00 гача 78-150-33-44 ва 78-150-64-12 телефон рақамлари фаолияти йўлга қўйилди.

Ўзбекистон мусулмонлари идораси Матбуот хизмати

Muallif: Админ
Sana: 21.03.2020
255
421

Бутун дунёни ташвишга солаётган коронавирус инфекцияси 160 дан ортиқ мамлакатда тарқалгани, касалланганлар сони 190 минг нафарга етгани, 7,5 минг ўлим ҳолати қайд этилгани ҳар бир кишини янада ҳушёр бўлишга, унинг олдини олиш тадбирини кўришга ундайди.

Мана шундай юқумли хасталикларни тез орада инсоният бошидан аритиш борасида Қуръони карим, ҳадиси шарифлар ва мўътабар манбаларда дуою тазаррулар ўқиш баён этилган.

Шу боис, Ўзбекистон мусулмонлари идораси ташаббуси билан бир қатор хайрия ишларни бошлаб юборилди. Жумладан, Қорақалпоғистон Республикаси, вилоятлар ва Тошкент шаҳрида жонлиқлар сўйилиб, гўштлари кам таъминланган оилалар, ёрдамга муҳтож кишилар, дуоси мустажоб инсонларга ва меҳрибонлик уйларига хайрия қилиш ишлари бошланди.

Имом-хатиблар ва имом ноиблари томонидан 20 март куни “Нажот сўраш” намозини адо этиб, ибодатлардан сўнг “Солатун ножия”, “Солатун нория”, “Ҳасбуналлоҳу ва ниъмал вакил” каби дуолар, илтижолар қилинади.

“Солатун ножия (тунажжино)” дуоси

اللَّهُمَّ صَلِّ عَلَى سَيِّدِنَا مُحَمَّدٍ صَلاَةً تُنَجِّينَا بِهَا مِنْ جَمِيعِ الأَهْوَالِ وَالآفَاتِ وَتَقْضِي لَنَا بِهَا جَمِيعَ الْحَاجَاتِ وَتْطَهِّرُنَا بِهَا مِنْ جَمِيعِ السَّيِّئاتِ وَتَرْفَعُنَا بِهَا عِنْدَكَ أَعْلَى الدَّرَجَاتِ وَتُبَلِّغُنَا بِهَا أَقْصَى الْغَايَاتِ مِنْ جَمِيعِ الْخَيْرَاتِ فِي الْحَيَاةِ وَبَعْدَ الْمَمَاتِ

“Аллоҳумма солли ала саййидина Муҳаммадин солатан тунажжина биҳа мин жамиъил-аҳваали вал аафаати ва тақзий ланаа биҳа жамийъал ҳажаати ва тутоҳҳируна биҳа мин жамийъис-саййиаати ва тарфауна биҳа иъндака аълад-дарожаати ва тубаллиғунаа биҳа ақсол-ғояти мин жамийъил-хойроти фил ҳаяти ва баъдал мамаати.”

Ушбу дуони ўқиш орқали Ҳазрати Пайғамбаримиз соллаллоҳу алайҳи васалламга кўп саловот айтиш илтижоларнинг ижобат бўлиши, мушкулларнинг кушойиш этилишига сабаб экани ҳақида ривоятлар келган. Ҳазрат Умар ибн Хаттоб разияллоҳу анҳу: “Набий соллаллоҳу алайҳи васалламга салавот айтмас экансан, қилган дуойинг ер ва осмон ўртасида тўхтаб туради, ундан бирор нарса кўтарилмайди”, деганлар (Имом Термизий ривояти).

Машҳур олим Зайниддин Ироқий: “Ушбу ривоят гарчи Умар разияллоҳу анҳудан ривоят қилинган бўлса-да, одатда бу каби хабарлар кишининг фикридан келиб чиқиб айтилмаслиги жиҳатидан марфуъ – Расулуллоҳ саллаллоҳу алайҳи васаллам айтганлари ҳукмидадир”, деган.

Ҳиббон ибн Мунқиз розияллоҳу анҳудан ривоят қилинган ҳадисда бундай дейилади: «Бир киши “Эй Аллоҳнинг расули, дуойимни учдан бирини сизга салавот айтиш учун ажратайинми?” деди. У зот: “Агар хоҳласанг, майли”, дедилар. “Учдан иккисини ажратсамчи?” деди. “Майли”, дедилар. “Ҳаммасини ажратсамчи?” деди. “Унда дунё ва охиратингдаги ғам-ташвишингга Аллоҳ кифоя қилади”, дедилар» (Имом Табароний ривояти).

“Солатун нория” дуоси

اَللّٰهُمَّ صَلِّ صَلَاةً كَامِلَةً وَسَلِّمْ سَلَامًا تَامًّا عَلٰى سَيِّدِنَا مُحَمَّدٍ الَّذِى تَنْحَلُّ بِهِ الْعُقَدُ، وَتَنْفَرِجُ بِهِ الْكُرَبُ، وَتُقْضٰى بِهِ الْحَوَآئِجُ، وَتُنَالُ بِهِ الرَّغَائِبُ، وَحُسْنُ الْخَوَاتِمِ، وَيُسْتَسْقَى الْغَمَامُ بِوَجْهِهِ الْكَرِيْمِ، وَعَلٰى اٰلِهِ وَ صَحْبِهِ فِي كُلِّ لَمْحَةٍ وَنَفَسٍ بِعَدَدِ كُلِّ مَعْلُوْمٍ لَّكَ

“Аллоҳумма солли солатан каамилатан ва саллим саламан таамман аъла саййидина Муҳаммадинил-лазий танҳаллу биҳил уқад ва танфарижу биҳил кураб, ва туқзо биҳил ҳавааиж, ва тунаалу биҳир-рағооиб ва ҳуснул-ҳаватим. Ва юстасқол ғамам би-важҳиҳил-карим ва ала аалиҳи ва соҳбиҳи фи кулли ламҳатин ва нафасин би-аъдади кулли маълуммил-лак”.

“Солатун нория” дуоси тариқат пешвоси Шайх Аҳмад Рифоий қуддиса сирруҳудан нақл қилинган бўлиб, у зотнинг тавсиялари асосида баъзи ихлосмандлар томонидан ҳозирга қадар ўқиб келинади. Айниқса, бу дуо 4444 марта ўқилиши натижасида Аллоҳ таолонинг инояти ила ҳожатларнинг бароридан келиши, дуолар ижобат бўлиши кўпчилик томонидан эътироф этилган.

Шунингдек, замонамиз алломаси, фақиҳи, Шайх Муҳаммад Тақий Усмоний ҳафизаҳуллоҳ бундай пайтларда 3 мартадан “Фотиҳа”, “Ихлос” суралари ва حَسْبُنَا اللهُ وَنِعْمَ الْوَكِيلُ – “Ҳасбуналлоҳу ва ниъмал вакил” дуоларини ўқишни тавсия этдилар.

Ўзбекистон мусулмонлари идораси тасарруфидаги диний таълим муассасаларининг устоз ва талабалари ўз уйларида Қуръони каримни 70 марта хатм қилишга киришдилар. Шу билан бирга, Имом Бухорийнинг “Ал-Жоме Ас-Саҳиҳ” асарини ҳам ўқишяпти. Имом Термизий ривоят қилган ҳадиси шарифда Набий соллаллоҳу алайҳи васаллам: «Аллоҳ таоло: «Кимни Қуръон ва Менинг зикрим Мендан (нарсаларни) сўрашдан тўсган бўлса, унга сўровчиларга берган нарсамдан афзалини берурман», деб марҳамат қилган» дедилар (Имом Термизий ривояти).

Қуръони карим хатм қилиб бўлингач, Имом Бухорийнинг “Ал-жоме ас-саҳиҳ” асари ўқиб тугатилгач энг табаррук уламолар иштирокида хатми Қуръонлар, салавотлар ижобатини сўраб, якуний дуолар қилинади. Худди шу тарзда республикамизнинг барча вилоятларида ҳам шундай хайрли ишлар ва дуою тазаррулар адо этилади.

Бу иш ҳам қуйидаги ҳадиси муборакка ҳамоҳангдир. Ҳазрати Пайғамбар алайҳиссалом «Бир қавм жамланса, баъзиси дуо қилса ва қолганлари “омин”, деса, албатта, Аллоҳ таоло уларни ижобат қилади», деганлар (Имом Табароний ривояти).

Саудия Арабистонидаги ҳамкор ширкатлар вакиллари ҳам Маккаи мукаррамадаги Ҳарами шариф – Байтуллоҳ ва Мадинаи мунавварадаги Масжид ан-Набий каби илтижолар шаксиз қабул бўладиган муборак масканларда дуо-тазарруда бўлишлари кўпчилигимизни мамнун этади.

Ўз навбатида, халқимизни мана шундай синовли дамларда жипс бўлиб, оила даврасида, фарзанду аржумандлар бирла зикр, истиғфор ва балони даф бўлиши учун дуою тазарруда бўлишларини айни муддаодир.

Буюк ва Ҳаким Зот Аллоҳ таолодан ушбу синовлардан муваффақиятли ўтишимизда ёрдам ва раҳмат сўраймиз. Аллоҳим барчаларимизни ушбу касалликдан ўз паноҳида асрасин, берморларга комил шифо берсин!

Ўзбекистон мусулмонлари идораси Матбуот хизмати

Muallif: Админ
Sana: 21.03.2020
323
409

Muborak qadamjolarni ziyorat qilish, ulamolarimiz bilan suhbat qurish maqsadida yurtimizda bir necha kundan buyon mehmon bo‘lib turgan Pokiston Islom Respublikasining bir guruh tariqatchilar delegatsiyasi Samarqand shahrida o‘tkazilayotgan xalqaro anjumanda ham ishtirok etmoqda.

Nufuzli anjuman doirasida O‘zbekiston musulmonlari idorasi raisi, muftiy Usmonxon Alimov hazratlari ushbu delegatsiya rahbari, Pokistondagi naqshbandiya tariqatining yetakchisi Shayx Muhammad Naqibur-Rohman Naqshbandiy hazratlari bilan muloqot o‘tkazdilar.
Samimiy suhbat davomida Shayx Muhammad Naqibur-Rohman Naqshbandiy hazratlari yurtimiz haqidagi taassurolari bilan o‘rtoqlashdi: “O‘zbekiston zaminida turganimizdan nihoyatda mamnunmiz. Jahonning ko‘plab mamlakatlarida bo‘lganmiz. Ammo yurtingizga ilk tashrifimiz edi. Fayzli zaminga ilgariroq kelmaganimizdan taassufdamiz. Bu yerda muborak qadamjolarni ziyorat qilib, o‘zgacha shukuh va sokinlikoldik”.
Muftiy hazrat mehmonlarga safarlari xayrli va barakali bo‘lishini, ziyoratlari manfaatli bo‘lishini tiladilar.

O‘zbekiston musulmonlari idorasi matbuot xizmati

Muallif: Админ
Sana: 04.03.2020
284